முள்ளங்கி பால்க்கறி / வெள்ளைக்கறி!

• 500 கிராம் முள்ளங்கி
• 1 வெங்காயம்
• 3 பச்சைமிளகாய்
• ¾ தே.க மஞ்சள் தூள்
• ½ கப் தேங்காய்ப்பால்
• சிறிது கறுவாப்பட்டை 
• தண்ணீர்*
• உப்பு
• தேசிப்புளி

தாளிதம்:

• 1 தே.க கடுகு 
• ½ தே.க பெருஞ்சீரகம்
• ½ வெங்காயம்
• 3 செத்தல் மிளகாய்
• கறிவேப்பிலை
• எண்ணை

செய்முறை:

1. முள்ளங்கியின் தோலை நீக்கி, சீவி வைக்கவும் அல்லது சிறிய துண்டுகளாக வெட்டி வைக்கவும். 
2. ஒரு பாத்திரத்தில் சிறிது எண்ணை விட்டு சூடாக்கவும். எண்ணை சூடானதும், அதில் வெங்காயம் மற்றும் பச்சைமிளகாய் போட்டு, வெங்காயம் கலர் மாறும் வரை வதக்கவும். 
3. சீவி அல்லது சிறிய துண்டுகளாக வெட்டி வைத்த முள்ளங்கி, மஞ்சள் மற்றும் உப்பு சேர்த்து 5 நிமிடங்கள் வதக்கவும். முள்ளங்கி தண்ணீர் விட்டு வதங்கியதும், தேங்காய்ப்பால் மற்றும் கறுவாப்பட்டையை ஒன்று பாதியாக உடைத்துச் சேர்த்து கலந்து விடவும். ஒரு கொதி வந்த பின்பு அடுப்பில் இருந்து இறக்கி ஆற விடவும்.
4. ஒரு பாத்திரத்தில் சிறிது எண்ணை விட்டு சூடாக்கவும். எண்ணை சூடானதும், அதில் கடுகு போடவும். கடுகு வெடிக்கும் போது, பெருஞ்சீரகம், வெங்காயம், செத்தல் மிளகாய் மற்றும் கறிவேப்பிலை சேர்த்து, வெங்காயம் கலர் மாறும் வரை வதக்கவும்.
5. முள்ளங்கி பால்க்கறி / வெள்ளைக்கறி ஆறியதும், தேசிப்புளி மற்றும் தாளிதம் சேர்த்துக் கலக்கவும். சோற்றுடன் பரிமாற சுவையாக இருக்கும்.

முள்ளங்கி பால்க்கறி / வெள்ளைக்கறி தயார்!

குறிப்பு:

• முள்ளங்கியை சீவி சமைக்கும் போது தண்ணீர் தேவைப்படாது, ஆனால் சிறிய துண்டுகளாக வெட்டி சமைக்கும் போது, முள்ளங்கி அவிய தண்ணீர் சேர்க்க வேண்டும்.
• இந்த கறியை அசைவமாக சமைக்க வேண்டும் என்றால், கறுவாப்பட்டையை தவிர்த்து, இறால் அல்லது மாஸ்கோ கருவாடு சேர்த்து சமைக்கலாம்.